Klubi i Tiranës ka vendosur të ndërrojë trajnerin pas një periudhe të shkurtër dhe të vështirë. Sipas “Panorama Sport”, bardheblutë i kanë dhënë fund bashkëpunimit me Vangjel Milen, i cili qëndroi në krye të ekipit vetëm për 55 ditë dhe drejtoi skuadrën për dy javë në kampionat.
Vendimi i klubit erdhi menjëherë pas humbjes 3-1 ndaj Vorës në Laç, një rezultat që shkaktoi pakënaqësi te drejtuesit dhe tifozët bardheblu.
Në stolin e Tiranës do të ulet Roberto Bordin, një emër i njohur për futbollin shqiptar, pasi ka drejtuar më parë Elbasanin. Për italianin, ky do të jetë përvoja e dytë në Kategorinë Superiore.
Drejtuesit e Tiranës presin që eksperienca dhe disiplinimi i Bordinit të sjellin stabilitet në një skuadër që synon të rikthehet te rezultatet pozitive dhe të garojë seriozisht për objektivat sezonalë.
Nga ana tjetër, aventura e Vangjel Miles në kryeqytet ishte tepër e shkurtër. Përveç rezultateve jo bindëse, koha nuk i mjaftoi trajnerit shqiptar për të vendosur idetë e tij në fushë. Humbja ndaj Vorës rezultoi fatale, duke vulosur largimin e tij nga stoli bardheblu.
Me emërimin e Bordinit, bardheblutë synojnë të nisin një faqe të re në këtë sezon. Objektivi mbetet i qartë: rikthimi në krye të klasifikimit dhe fitimi i trofeve që i kanë munguar në vitet e fundit.
