Nuk ka më dilema – të paktën për momentin! Ndeshja mes Tiranës dhe Elbasanit do të luhet të mërkurën në orën 19:30 në “Air Albania”, ashtu siç ishte planifikuar fillimisht. Po, saktë, në atë orar që ishte, pastaj u ndryshua… dhe tani është kthyer prapë si në fillim.
Më herët, FSHF-ja kishte njoftuar se dueli do të zhvillohej në orën 14:00 në stadiumin “Selman Stërmasi”, duke hutuar jo pak tifozë që filluan të bënin plane mes punës, shkollës dhe drekës. Por mesa duket, federata ka “rishikuar orarin” dhe ka vendosur t’i kthehet versionit origjinal – mbrëmja e të mërkurës, në arenën kombëtare.
Kështu që, tifozët e Tiranës dhe të Elbasanit mund të lënë celularin, sepse orari i ndeshjes nuk ka ndryshuar… ose më mirë të themi, është kthyer aty ku ishte. Për çdo siguri, ndoshta mos e shënon në kalendar me stilolaps, se nuk i dihet kurrë!
Përtej humorit, pritet një përballje e nxehtë mes dy skuadrave që kërkojnë pikë jetike. Për trajnerin Roberto Bordin, kjo ndeshje ka edhe shije emocionale, pasi sezonin e kaluar ai drejtoi për disa kohë pikërisht Elbasanin. Këtë herë, do të përballet me ish-ekipin e tij në një “Air Albania” që premton spektakël – nëse federata s’vendos ta ndryshojë orën përsëri në minutën e fundit!