Një vendim gjykate i ka hapur rrugë Prokurorisë së Posaçme (SPAK) dhe Byrosë Kombëtare të Hetimit (BKH) për të kryer kontrolle në pronat dhe bizneset e Artan Dulakut, i njohur si një nga emrat më të fuqishëm në ndërtim dhe media.
Sipas burimeve, hetimi lidhet me pronat e ushtrisë, konkretisht me portin ushtarak të Limionit në Sarandë, ku dyshohet për manipulim të kontratës së përdorimit.
SPAK ka arritur të bindë gjykatën se kontrollet ishin të domosdoshme për të siguruar prova që mund të vërtetojnë përfshirjen në procedurat e dyshuara abuzive.
Operacioni është ende në vijim, ndërsa kontrollet janë shtrirë jo vetëm në pasuritë dhe aktivitetet e Dulakut, por edhe në disa ambiente të lidhura me zyrtarë dhe ish-zyrtarë publikë që mund të kenë pasur rol në procesin e marrëveshjes për portin e Limionit.
Hetimi pritet të hedhë dritë mbi mënyrën se si është administruar dhe dhënë në përdorim një nga asetet strategjike të ushtrisë shqiptare në jug të vendit.
