Ish-deputeti Edmond Spaho ka reaguar ashpër ndaj deputetit të PD-së, Flamur Noka, pas konfliktit të këtij të fundit me anëtaren e Kryesisë së PD në Kamëz, Anila Aliaj. Përmes një deklarate ironike në rrjetet sociale, Spaho akuzon Nokën se po vepron në mënyrë autoritare dhe se po ndëshkon këdo që shpreh mendim ndryshe brenda partisë.
Sipas tij, përjashtimi i Aliajt nga kryesia vetëm pse kërkoi llogari për mosrespektimin e primareve, është një praktikë që i ngjan periudhës së Partisë së Punës, kur “të dënonin për shkelje të vijës së Partisë dhe të syrgjynosnin”. Spaho thekson se anëtarësia e PD-së nuk mund të trajtohet si një trup që nuk duhet të mendojë, por vetëm të zbatojë urdhrat e një individi.
Ai kujton se përjashtime të tilla kanë ndodhur edhe në kohën e Lulzim Bashës, kur disa deputetë—mes tyre edhe vetë Flamur Noka—u larguan nga grupi sepse kishin mendime të ndryshme. Sipas Spahos, i njëjti mentalitet autoritar po përsëritet sot, qoftë nga “Foltorja” e Berishës, qoftë nga Partia Socialiste e Edi Ramës.
“Fole po deshe. Jetojmë në demokraci”, përfundon ai me ironi.
