Agjencia Kombëtare e Mbrojtjes Civile ka bërë të ditur përditësimin më të fundit mbi situatën e krijuar nga reshjet intensive. Në disa zona situata është stabilizuar, ndërsa qarqet Vlorë, Lezhë dhe Fier mbeten më të prekura, duke kërkuar evakuimin e disa familjeve për shkak të rrezikut nga përmbytjet.
Qarku Vlorë – Tërheqje e ujërave të Vjosës, 10 familje të evakuuara
Lumi Vjosa ka pësuar rritje të ndjeshme të prurjeve, duke detyruar evakuimin e 7 familjeve në Novoselë dhe 3 të tjera pranë urës së Mifolit. Të gjithë banorët janë sistemuar pranë të afërmve.
Në Himarë është bërë e mundur hapja e rrugës Shën Vasil–Nivicë, ndërsa vazhdojnë pastrimet në akse të tjera.
Në Sarandë monitorohet situata në aksin Sarandë–Delvinë dhe po punohet për forcimin e argjinaturës së Bistricës si edhe rikthimin e energjisë në tunelin e Llogarasë.
Ndërhyrje janë kryer dhe në Ksamil, Metoq e Vrion për largimin e ujërave.
Qarku Fier – Prurjet e Vjosës nën monitorim të rreptë
Prurjet e Vjosës kanë shkaktuar përmbytje në 50–60 hektarë tokë bujqësore në zonat Kashisht–Çervën–Ferras.
Një familje është evakuuar, ndërsa 30 oborre banesash kanë prezencë uji.
Për siguri janë stakuar pompat e ujësjellësit në Kafaraj.
Prurjet në lumin Seman janë rritur, por nuk paraqesin rrezik për banesat.
Qarku Korçë – Rritje prurjesh në Devoll dhe Dunavec
Në Dërsnik, Bulgarec dhe lagjen nr. 6 po kryhen devijime të përkohshme të ujërave.
Në Sheqeras ekipet po punojnë për ndërhyrje urgjente.
Pastrimi i rrugëve nga gurët vijon në akset Qafë Plloçë–Qukës dhe Pogradec–Qafë Thanë.
Qarku Lezhë – Argjinatura e Vainit në rrezik, evakuime me varka
Në Shënkoll dhe Zejmen niveli i ujit vazhdon të rritet për shkak të çarjes së argjinaturës së lagunës së Vainit.
Në disa zona janë kryer evakuime me varka, ndërsa punimet për riparimin e argjinaturës vijojnë intensivisht.
Ndërhyrje po kryhen edhe në aksin Skuraj–Gallatë–Vinjollë.
Në Mirditë situata është stabilizuar dhe niveli i Drinit është në rënie.
Qarku Durrës – Situata drejt normalizimit
Lumenjtë Erzen, Ishëm dhe Zezë nuk paraqesin rritje niveli.
Po pastrohen kanalet e Tonës dhe Tarinit, ndërsa lumi Erzen është tërhequr.
Në Krujë ka përfunduar forcimi i argjinaturës së lumit Droje.
Në zonat bujqësore ujërat janë tërhequr ndjeshëm.
Qarku Dibër – Ndërhyrje në zona malore
Në Bulqizë situata është stabilizuar, ndërsa puna vazhdon në rrugët e qytetit të vjetër.
Ndërhyrje janë kryer në Luzni, Zall Dardhë dhe Muhur.
Me ndihmën e Forcave të Armatosura është normalizuar situata në Bruç.
Në Klos vijon pastrimi pas rrëshqitjeve të dherave.
Qarku Shkodër – Reshje intensive, forcimi i terrenit
Në Fushë-Arrëz po pastrohen rrugët nga prurjet, ndërsa në Malësinë e Madhe është rritur niveli i përroit të Thatë.
Qarku Berat – Monitorim i vazhdueshëm i lumit Osum
Niveli i Osumit është rritur ndjeshëm, duke rrezikuar zonën e lagjes Goricë.
Ndërhyrje po kryhen nga UKT në lagjen 28 Nëntori.
Në Poliçan ujërat janë tërhequr, ndërsa në Dimal ende ka prezencë uji në disa sipërfaqe bujqësore.