Në fshatin Shtëpanjë të Bashkisë Cerrik ka nisur një investim me rëndësi për komunitetin: rikonstruksioni total i Qendrës Shëndetësore, falë mbështetjes së fondacionit “Mirësia”. Kjo ndërhyrje do të japë fund problemeve të shumta që ka pasur prej vitesh godina ekzistuese, e cila ishte tashmë e amortizuar dhe larg standardeve të kohës.
Punimet parashikojnë një transformim tërësor të ndërtesës, duke e kthyer atë në një qendër shëndetësore moderne, me ambiente të përshtatshme, aparatura të nevojshme dhe kushte të plota higjieno-sanitare. Synimi është që çdo banor i zonës të marrë shërbim cilësor, të shpejtë dhe pranë vendbanimit, pa qenë nevoja të udhëtojë në qytet për nevoja bazike mjekësore.
Ky investim është një hap i rëndësishëm për rritjen e cilësisë së jetesës në Shtëpanjë dhe tregon se vëmendja ndaj shëndetit publik mbetet prioritet. Përmes bashkëpunimit të institucioneve dhe fondacioneve, komuniteti përfiton jo vetëm një godinë të re, por edhe garanci për shërbime më të mira, më të sigurta dhe afatgjata.
albaniaexpress.al