Në kuadër të Ditës Botërore të Ushqimit dhe 80-vjetorit të Organizatës së Ushqimit dhe Bujqësisë (FAO), Ministri i Bujqësisë dhe Zhvillimit Rural, z. Andis Salla, priti në takim z. Raimund Jehle, përfaqësues i FAO-s në Shqipëri dhe Drejtor Rajonal për Evropën dhe Azinë Qendrore.
Gjatë takimit u riafirmua partneriteti i gjatë dhe i frytshëm mes Ministrisë dhe FAO-s, me të cilën Shqipëria bashkëpunon që prej vitit 1973. Palët konfirmuan angazhimin e tyre të përbashkët për zhvillimin e qëndrueshëm të sektorit bujqësor dhe forcimin e ekonomisë rurale në vend.
Ministri Salla shprehu mirënjohjen për mbështetjen e vazhdueshme dhe u shpreh besimplotë për kontributin e FAO-s në procesin e ristrukturimit të Ministrisë, në përputhje me Politikat e Përbashkëta Bujqësore të Bashkimit Evropian (CAP).
Ky proces do të shërbejë si bazë për hartimin e politikave të reja bujqësore që synojnë realizimin e vizionit “Bujqësia 2030” dhe zhvillimin e qëndrueshëm të Shqipërisë deri në vitin 2030.
Bashkëpunimi mes Ministrisë së Bujqësisë dhe Zhvillimit Rural dhe FAO-s mbetet një shtyllë e rëndësishme për avancimin e sektorit, duke kontribuar në sigurinë ushqimore dhe zhvillimin rural të vendit tonë.