Tenori shqiptar me famë botërore, Saimir Pirgu, dhuroi mbrëmë në Shirokë një koncert të paharrueshëm për artdashësit e muzikës klasike.
Nën drejtimin e maestros Elda Laro, me Orkestrën Simfonike të Shkodrës dhe Korin e Qendrës Kulturore të Fëmijëve “Kujtim Alija”, Pirgu solli një program të pasur artistik ku u ndërthurën kryevepra botërore dhe perla të muzikës operistike shqiptare.
Qindra qytetarë, turistë dhe dashamirës të artit ndoqën një mbrëmje të jashtëzakonshme, teksa Shiroka u shndërrua në një skenë të madhe të tingujve klasikë.
Një karrierë botërore
Saimir Pirgu, i cilësuar si një nga tenorët më të mëdhenj të gjeneratës së tij, ka ndriçuar skenat më prestigjioze të botës: Metropolitan Opera në Nju-Jork, La Scala në Milano, Royal Opera House në Londër dhe Staatsoper në Vjenë.
Ai ka interpretuar role kryesore të repertorit klasik, mes tyre Rodolfo në La Bohème, Cavaradossi në Tosca, Alfredo në La Traviata dhe princi Kalaf në Turandot.
Rikthimi në Shqipëri
Pas një mungese 13-vjeçare, në nëntorin e vitit të kaluar Pirgu u rikthye në skenën e Teatrit Kombëtar të Operës dhe Baletit me operën Tosca të Giacomo Puccinit, duke interpretuar rolin e Mario Cavaradossi-t.
Vlerësime dhe çmime
Pirgu ka bashkëpunuar me dirigjentë legjendarë si Claudio Abbado, Riccardo Muti dhe James Levine, duke marrë vlerësime të larta nga kritika ndërkombëtare. Ndër çmimet më të rëndësishme që ka fituar spikat “Pavaroti D’Oro” (Pavaroti i Artë).
