Shtetet e Bashkuara e konsiderojnë partneritetin me Indinë si një nga marrëdhëniet më të rëndësishme globale të këtij shekulli, duke theksuar se bashkëpunimi mes dy vendeve po arrin nivele të reja. Në një deklaratë të ambasadës amerikane në Nju Delhi, Uashingtoni vlerëson forcimin e lidhjeve me Indinë në fusha strategjike, në një kohë kur peizazhi ndërkombëtar po bëhet gjithnjë e më kompleks.
Deklarata vjen ndërsa kryeministri indian, Narendra Modi, u pa duke ecur përkrah presidentit rus, Vladimir Putin, në samitin e Organizatës së Bashkëpunimit të Shangait (SCO) në Kinë. Më pas, të dy udhëheqësit iu bashkuan presidentit kinez, Xi Jinping, duke dërguar një mesazh të fortë simbolik për unitetin rajonal.
Pavarësisht lidhjeve në rritje me SHBA-në, India vazhdon të mbajë marrëdhënie të ngushta ekonomike me Rusinë, veçanërisht në sektorin e energjisë. Së bashku me Kinën, India është një nga blerësit më të mëdhenj të naftës ruse, çështje që ka shqetësuar Perëndimin.
Presidenti amerikan Donald Trump kishte vendosur tarifa shtesë ndaj Indisë për shkak të importeve të vazhdueshme të naftës ruse, por deri tani nuk ka treguar shenja që Nju Delhi apo Pekini do të ndalojnë këto blerje, të cilat konsiderohen jetike për ekonomitë e tyre.
Megjithatë, zyrtarët amerikanë theksojnë se, edhe pse India ndjek një politikë të jashtme të pavarur, partneriteti strategjik me SHBA-të mbetet i fortë dhe në zhvillim e sipër.
