Ministrja për Europën dhe Punët e Jashtme, Elisa Spiropali, po merr pjesë në Samitin e parë Ndërqeveritar Shqipëri–Itali, ku delegacioni shqiptar kryesohet nga Kryeministri Edi Rama.
Gjatë ditës, ministrja Spiropali do të zhvillojë një takim bilateral me Zëvendëskryeministrin dhe Ministrin e Jashtëm italian, Antonio Tajani. Në kuadër të këtij takimi, pritet të nënshkruhet Memorandumi i Mirëkuptimit mbi Bashkëpunimin në fushën e Sigurisë Kibernetike, një hap konkret drejt forcimit të partneritetit strategjik mes dy vendeve.
Ky samit përfaqëson një moment të rëndësishëm në konsolidimin e bashkëpunimit dypalësh në fusha kyçe si mbrojtja dhe siguria, energjia, migracioni, shëndetësia, zhvillimi ekonomik dhe infrastruktura.
Në fjalën e saj, ministrja Spiropali pritet të theksojë rëndësinë e bashkëpunimit të ngushtë me Italinë përballë sfidave globale të sigurisë, si dhe të ripohojë përkushtimin e Shqipërisë për avancimin e projekteve të përbashkëta në kuadër të partneritetit strategjik mes dy vendeve.
