Në Tiranë u zhvillua Konferenca Ndërkombëtare për Qeverisje, ku një nga panelet kryesore iu kushtua perspektivës së Shqipërisë në procesin e integrimit europian. Gjatë fjalës së tij, kryeministri Edi Rama theksoi se rruga drejt Bashkimit Europian ka më shumë peshë sesa vetë rezultati final i këtij procesi.
Integrimi si proces i domosdoshëm
“Udhëtimi është ai që kemi nevojë. Nëse ne bëhemi një vend që vepron si një vend anëtar i BE, kjo do të ishte trashëgimia më e madhe për fëmijët tanë, që të rriten në një shtet ku institucionet funksionojnë si në Itali apo një vend tjetër mesdhetar. Procesi për ne është po aq i rëndësishëm, madje edhe më i rëndësishëm se rezultati përfundimtar,” tha Rama.
Ai nënvizoi se integrimi nuk duhet parë vetëm si qëllim politik, por edhe si një kanal teknik për transferimin e njohurive dhe praktikave më të mira europiane.
Teknologjia dhe mirëqeverisja
Një tjetër pikë ku u ndal kryeministri ishte rëndësia e përdorimit të teknologjisë për të modernizuar qeverisjen dhe për ta bërë atë më të afërt me qytetarët.
“Teknologjia e re u jep shteteve si i yni mundësinë të bëjnë hapa që përndryshe do të ishin të pamundur. Ne kemi arritur të ofrojmë shërbime online falë aplikimit të inteligjencës artificiale. Synimi ynë është të krijojmë modelin e parë në Europë të prokurimeve publike që do të funksionojë nga fillimi deri në fund përmes AI,” deklaroi Rama.
Synimi: shembull europian në prokurimet publike
Sipas tij, Shqipëria ka bërë progres të konsiderueshëm në këtë drejtim dhe projekti për të aplikuar inteligjencën artificiale në prokurimet publike do ta vendosë vendin si pararojë në nivel kontinental.
