Në kuadër të punës për lirimin e hapësirave publike, kryeministri Edi Rama deklaroi se për çdo karrige në hapësirë publike të kufizuar do të duhet të kontribuohet me një pemë në Fondin e Gjelbër, që do të krijojë qeveria e re.
Rama ndau pamje nga puna e përditshme për lirimin e hapësirave që janë zënë padrejtësisht nga bizneset. Ai u bëri thirrje qytetarëve dhe pronarëve të biznesit të tregojnë durim, duke paralajmëruar se së shpejti do të vendosen kushtet e reja për vendosjen e karrigeve jashtë.
Lirimi i hapësirave publike është i domosdoshëm për përmirësimin e cilësisë së shërbimeve dhe funksionalitetit të çdo biznesi, sipas standardeve kombëtare të mikpritjes, jo vetëm në zonat turistike, por në të gjithë Shqipërinë.
Kryeministri njoftoi gjithashtu se po hartohet Rregullorja Kombëtare, e cila do të përcaktojë me ligj hapësirat që mund të shfrytëzojë biznesi. Puna ka nisur që në korrik dhe do të vijojë si pjesë e programit “Rilindja Urbane 2.0”, me angazhim të pushtetit vendor dhe qendror për të mbrojtur cilësinë e jetës në komunitet.
