Prej mëngjesit të së shtunës, më 9 gusht, godina e News24 është zaptuar nga Policia e Shtetit pa vendim gjyqësor, pa përmbarues dhe pa njoftim paraprak. Në shenjë solidariteti me 230 gazetarët, stafin teknik dhe punonjësit e Focus Media News dhe Panorama Group, që prej 3 ditësh nuk lejohen të hyjnë në ambientet e News24, BalkanWeb dhe Panorama, Asociacioni i Gazetarëve të Shqipërisë (AGSH) ka nisur protestën para godinës së televizionit.
Në protestë marrin pjesë gazetarë, politikanë, personazhe publike dhe aktivistë, duke shprehur mbështetjen e tyre për median dhe lirinë e shtypit.
Kreu i AGSH, gazetari Isa Myzyraj, në fjalën e tij theksoi se: “Këto janë ditë të vështira për komunitetin e gazetarëve dhe për lirinë e medias në Shqipëri. News24 është një prej kanaleve më të mëdha informative, dhe pengimi i punës së saj është një goditje për të drejtën e qytetarëve për t’u informuar. Nuk është media e parë që përballet me këtë situatë, por duhet të jemi të bashkuar dhe të rezistojmë maksimalisht.”
Myzyraj shtoi se: “Ne i bëjmë thirrje policisë, ministrisë së mbrojtjes, IKMT-së dhe çdo institucioni të ndalojë çdo veprim që mund të sjellë pasoja të pariparueshme për televizionin. Kemi hasur në bllokadë institucionale dhe ligjore për dokumentacionin që lidhet me këtë zaptim. Qeveria është fajtore, sepse po legjitimon këtë akt duke sjellë policë dhe ushtarë brenda një televizioni.”
Ai u shpreh se fajtorët duhet të mbajnë përgjegjësi dhe kërkoi përgjigje konkrete nga Këshilli i Ministrave dhe kryeministria, duke theksuar:
“Na duhen dokumente dhe jo deklarata në Facebook. Sot jemi këtu për të solidarizuar me kolegët tanë dhe për të treguar se ata nuk janë vetëm. Kjo është një betejë për lirinë e medias, për të cilën duhet të rezistojmë.”
Isa Myzyraj përfundoi duke kujtuar goditjet e mëparshme ndaj mediave:
“Dje u mbyllën Agon Channel dhe Ora News, sot është radha e News24. Kush e mendonte se televizioni më i madh informativ në vend do të përballej me policë dhe ushtarë?”
Protesta vazhdon, ndërsa gazetarët dhe shoqëria civile kërkojnë një zgjidhje ligjore dhe respekt për lirinë e medias në Shqipëri.
