Në Njësinë Administrative Lunik, vijojnë me ritme të shpejta punimet për rikonstruksionin e aksit rrugor Lunik–Prevallë, një segment jetik për lëvizjen e banorëve dhe transportin e produkteve bujqësore drejt tregjeve.
Kryetari i Bashkisë së Librazhdit, Mariglen Disha, së bashku me deputetin e PS-së, Olsi Komici, inspektuan nga afër ecurinë e punimeve, duke u ndalur në fazën më të rëndësishme të projektit – përfundimin e shtresave asfaltike.
Ky investim, i financuar nga fondet e bashkisë, përfshin sistemimin e terrenit, ndërtimin e mureve mbajtëse dhe asfaltimin e rrugës sipas standardeve bashkëkohore. Projekti pritet të sjellë lehtësim të lëvizjes, shkurtim të distancave dhe përmirësim të ndjeshëm të kushteve të jetesës për komunitetin e zonës.
“Kjo është një rrugë që u shërben dhjetëra familjeve dhe që forcon lidhjen mes fshatrave të thellë dhe qytetit. Është një premtim i mbajtur, që i jep frymë të re zhvillimit të zonës,” u shpreh kryebashkiaku Disha gjatë inspektimit.
Edhe deputeti Komici vlerësoi rëndësinë e këtij investimi, duke theksuar se infrastruktura mbetet një prioritet për qeverinë dhe pushtetin vendor në funksion të qytetarëve. Ky aks konsiderohet një ndër rrugët me impakt më të madh për zhvillimin e bujqësisë dhe për afrimin e komunitetit rural me qendrat urbane.
albaniaexpress
