Qeveria shqiptare vijon të konkretizojë një nga nismat më të rëndësishme për zhvillimin e zonave rurale dhe malore. Ministri i Shtetit për Pushtetin Vendor, Ervin Demo, bëri të ditur se gjatë javës së kaluar janë miratuar 9 vendime të reja në kuadër të “Paketës së Maleve”, në mbledhjen e Këshillit të Ministrave.
Me këto vendime, numri i bashkive që përfshihen në hartën e zhvillimit të ekonomisë malore arrin në 25, duke shënuar një zgjerim të ndjeshëm të kësaj nisme strategjike. Në total, tashmë janë 205 zona prioritare të miratuara në të gjithë vendin, të cilat synojnë të orientojnë investimet dhe të nxisin zhvillimin ekonomik në zonat me potencial të lartë natyror dhe turistik.
Në këtë fazë të re, pjesë e “Paketës së Maleve” janë bërë edhe bashkitë Vlorë, Kavajë, Durrës, Dimal, Mirditë, Berat, Himarë, Librazhd dhe Rrogozhinë, të cilat i bashkohen kësaj harte zhvillimi kombëtar.
Kjo iniciativë synon të kthejë potencialin e zonave malore në një motor real të ekonomisë vendore, duke krijuar më shumë mundësi për banorët, rritur investimet dhe promovuar zhvillimin e qëndrueshëm.
“Paketa e Maleve” konsiderohet një hap konkret drejt fuqizimit të pushtetit vendor dhe rritjes së mirëqenies në komunitetet lokale, duke i dhënë një rol të ri zonave që për vite me radhë kanë qenë jashtë vëmendjes kryesore të zhvillimit ekonomik.