Asambleja e Përgjithshme e Partisë Socialiste u mblodh sot, ku kryeministri dhe njëherazi kreu i PS-së, Edi Rama, prezantoi qeverinë e re për mandatin e tij të katërt në drejtimin e vendit.
Në fjalën e tij, Rama bëri të ditur emrat që do të marrin postet kyçe të lidershipit institucional, duke nisur nga drejtimi i Kuvendit të Shqipërisë. Kryeministri propozoi Niko Peleshi si kryetar të ri të Kuvendit, duke e konsideruar atë si figurën e duhur për të vijuar punën e nisur nga Elisa Spiropali.
“Pas kaq vitesh eksperiencë në një sërë institucionesh, si dhe për prirjen e hershme ndaj risive të teknologjisë, Niko Peleshi është njeriu i duhur për të marrë stafetën si kryetar i ri i Kuvendit të Shqipërisë”, – u shpreh Rama.
Ndërkohë, Rama konfirmoi se Klodiana Spahiu do të mbajë postin e nënkryetares së Kuvendit.
Një tjetër vendim i rëndësishëm i shpallur nga kreu i PS-së ishte emërimi i Taulant Ballës si kryetar i Grupit Parlamentar socialist. Rama theksoi se përvoja e gjatë e Ballës dhe angazhimi i tij politik e bëjnë atë personin e duhur për të udhëhequr grupin në mandatin e ri.
“Sa i përket drejtimit të grupit të ri parlamentar, ka shumë pak për t’u menduar. Për eksperiencën e gjatë, Taulant Balla është deputeti i duhur”, – deklaroi Rama, duke sqaruar se ai do të koordinojë veprimtarinë e deputetëve të shumicës dhe do të mbështesë zbatimin e programit qeverisës në Kuvend.
Me këto ndryshime, Partia Socialiste synon të forcojë lidershipin institucional dhe të nisë mandatin e katërt me një skuadër që, sipas Ramës, kombinon përvojën me vizionin për zhvillim.