Elbasani është duke i dhënë dorën e fundit përgatitjeve për ndeshjen e rëndësishme ndaj Dinamos, që do të zhvillohet nesër në stadiumin “Air Albania”. Në kampin verdheblu, kjo përballje është marrë me seriozitet maksimal, pasi skuadra synon të marrë pikët e plota dhe të vazhdojë formën pozitive të javëve të fundit.
Stafi teknik po punon intensivisht në aspektin taktik dhe menaxhimin e ritmit të lojës, duke qenë se përballë kanë një kundërshtar që kërkon kujdes në çdo fazë. Për Elbasanin, kjo sfidë nuk është vetëm një test force, por edhe një mundësi për të konfirmuar ritmin dhe ambiciet e këtij sezoni.
Rekordi në lojë – Në kërkim të fitores së pestë radhazi
Që prej rikthimit në Superiore, Elbasani nuk ka arritur kurrë të regjistrojë pesë fitore radhazi. Rekordi aktual është ai i katër fitoreve të njëpasnjëshme, arritur sezonin e kaluar ndaj Bylisit, Egnatias, Tiranës dhe Laçit.
E njëjta ecuri është përsëritur edhe këtë sezon me fitoret kundër Bylisit, Tiranës, Flamurtarit dhe së fundmi Egnatias. Një triumf nesër ndaj Dinamos do ta shënonte serinë më të suksesshme të Elbasanit në elitë që prej rikthimit, duke e vendosur ekipin në pikën kulmore të sezonit.
Ky fakt nuk sjell presion, por motivim të shtuar për lojtarët, të cilët e shohin këtë si mundësi për të lënë gjurmë në kampionat dhe për të forcuar pozitat në garën për “Final 4”. Tani mbetet për t’u parë nëse të besuarit e Ivan Gvozdenoviç do të arrijnë të marrin pikët e plota ndaj një rivali direkt për kreun.
Transfertat – Forca e Elbasanit jashtë fushe
Edhe pse në letër sfida zhvillohet në fushën e Dinamos, të dhënat e sezonit tregojnë një tjetër realitet. Elbasani është dukur më i qartë dhe më efikas në transfertë sesa në ndeshjet brenda fushe.
Në pesë ndeshjet e luajtura jashtë, verdheblutë kanë grumbulluar 10 pikë, me bilanc prej tre fitoresh, një barazimi dhe një humbjeje — asnjë skuadër tjetër nuk ka qenë më efektive si udhëtuese. Edhe pse Egnatia ka të njëjtin numër pikësh jashtë fushe, Elbasani i ka arritur në një ndeshje më pak, duke treguar pjekuri dhe aftësi të mira menaxhimi të presionit.
Këto elementë pritet të jenë vendimtarë edhe në përballjen e nesërme. Për më tepër, verdheblutë nuk shkojnë si inferiorë, madje pritet të kenë edhe përkrahjen e tifozëve të tyre në “Air Albania”.
