Muzeu i Artit dhe Trashëgimisë Islame, një qendër e re kulture që do të ndërtohet në një godinë historike në qendër të Tiranës, pritet të jetë gati brenda vitit 2030, tha kryeministri Edi Rama në fjalën e tij gjatë prezantimit të projektit këtë mbrëmje. Në këtë muze do të ekspozohen objekte e libra me vlerë të rrallë, dhe për kreun e qeverisë ky do të jetë një stacion kyç i historisë sonë si komb dhe i historisë së kryeqytetit në veçanti.
Rama vlerësoi arkitektin që do të punojë për këtë muze, Jesus Hernandez.
“Ajo që është e rëndësishme është se ky është një stacion kyç i historisë sonë si komb, i historisë së kryeqytetit. Kështu që, besoj se talenti i padiskutueshëm i arkitektit, që është autor i një tjetër muzeu shumë të bukur, Muzeu Marubi në Shkodër dhe projektues i Muzeut të Ri Kombëtar, është një garanci. Më vjen mirë që paralelisht po punon edhe për një tjetër muze në Shkodër, muzeun që i dedikohet martirizimit të klerit katolik. Kështu plotësojmë edhe një mozaik të munguar të historisë së fesë në Shqipëri, që do të ketë hapësirën e vet edhe në Muzeun Kombëtar”, tha Rama.
Kreu i qeverisë foli edhe për muzeun që pritet të hapet së shpejti, ku do të ekspozohet koleksioni i Artan Lames, i cili u nda nga jeta pak muaj më parë.
“Muzeu tjetër që është në ndërtim e sipër me koleksionin unikal të të ndjerit Artan Lame na jep mundësinë ta shohim të nesërmen e Tiranës të pasur me stacione arti, kulture dhe historie, që do të shkojnë duke u shtuar”.
