Mali i Dajtit, vetëm 22,4 kilometra larg qendrës së kryeqytetit, 1613 metra mbi nivelin e detit është një tjetër atraksion i mrekullueshëm për turistët.
Kryeministri Edi Rama, mëngjesin e sotëm ndau përmes një postimi në rrjetet sociale “pamje magjike” nga Mali i Dajtit.
Filmimet e kryera me dron nga lart, pasqyrojnë larmishmërinë e shtigjeve të pyjeve të dendura e të zverdhura në stinën e vjeshtës.
Mali i Dajtit me peizazhet pyjore të ahut, dushkut, gështenjave, frashërit, pishave të zeza, të fton të shkëputesh tërësisht nga jeta urbane e Tiranës për t’u bërë pjesë me natyrën.
Me rreth 26 lloje drurësh dhe shkurresh pyjore, të cilat mbulojnë rreth 80% të territorit, bimësh e barishtore, kafshët dhe shpendët e egra, dy majat dominuese, “ballkonet”, që qëndrojnë mbi shkëmbinjtë e pjerrët, kjo zonë është kthyer në një atraksion për turistët e huaj, që pëlqejnë natyrën dhe aventurën.
Vizitorët mund të shijojnë edhe pamjet spektakolare të perëndimit të diellit që në mbi 1000 metra lartësi ofrojnë një spektakël të mahnitshëm, duke u shoqëruar dhe nga një pafundësi dritash vezulluese të Tiranës.