Nga viti në vit, tetori duket se mbetet një periudhë “problematike” për Elbasanin, që çdo sezon përballet me rënie të dukshme në rezultate dhe performancë. Edhe pse skuadra e nis gjithmonë mirë kampionatin, me entuziazëm dhe fitore në javët e para, me mbërritjen e tetorit duket sikur gjithçka ndalon. Dy humbjet e fundit kanë ulur ndjeshëm moralin në kampin verdheblu, ku pritshmëritë për këtë sezon janë të mëdha.
Tetori aktual – Verdheblutë e nisën mirë rrugëtimin në kampionat, por ky muaj u ka sjellë vetëm zhgënjim. Fillimisht u mundën nga Vllaznia në transfertë me rezultatin 1-0, në një ndeshje ku mungoi qartësia në lojë. Më pas, në “Elbasan Arena”, skuadra u dorëzua përballë Vorës me shifrat 1-2, duke thelluar krizën. Në të dyja sfidat u vunë re problemet e zakonshme: mungesë ideje në ndërtimin e aksioneve, vështirësi në finalizim dhe pasiguri në mbrojtje. Kjo ka shtuar pakënaqësitë në klub, ku tashmë kërkohet reagim i menjëhershëm për të mos humbur kontaktin me kreun. Elbasani ka ende dy ndeshje të rëndësishme përpara — ndaj Bylisit në shtëpi dhe Tiranës në transfertë — që do të përcaktojnë nëse do të arrijë të thyejë mallkimin e tetorit apo do të mbetet sërish nën hijen e tij.
Tetori i kaluar – Edhe sezoni i shkuar dëshmon se kjo prirje nuk është e re. Edhe atëherë, pas një nisjeje të mirë, Elbasani u ndal në tetor me katër barazime radhazi. Edhe pse nuk u mund, mungesa e fitoreve ndikoi në moral dhe në renditje. Ai muaj u quajt “muaji i ngricës” për verdheblutë, ku ekipi nuk gjente mënyrën për të shënuar dhe për të fituar.
Testi i karakterit – Këtë herë, historia rrezikon të përsëritet. Me një grup të përmirësuar dhe ambicie të larta, Elbasani duhet të tregojë karakter për të përmbysur ecurinë negative. Skuadra ka mundësinë ta kthejë situatën në favor, por për këtë i nevojiten rezultate pozitive ndaj dy rivalëve të radhës. Një rikthim te fitorja do të sillte jo vetëm qetësi, por edhe sinjalin se Elbasani i këtij sezoni është më i pjekur dhe i aftë të përballojë presionin.
