Nga Fatmir Popja
Fshati turistik Fushë Studen dhe Parku Kombëtar i Shebenikut, në bashkinë e Librazhdit, kanë marrë këto ditë pamjen e një kartoline magjike dimërore. Reshjet e dëborës kanë mbuluar çdo cep të zonës, duke krijuar panorama spektakolare që të lënë pa fjalë dhe e shndërrojnë këtë destinacion në një nga më të bukurit e Shqipërisë gjatë sezonit të ftohtë.
Peizazhi i bardhë, pyjet e dendur të Parkut Kombëtar të Shebenikut, majat e mbuluara me dëborë dhe qetësia që mbizotëron në Fushë Studen krijojnë një atmosferë unike, ideale për adhuruesit e natyrës, fotografisë dhe turizmit malor. Shtëpitë karakteristike, rrugicat e fshatit dhe hapësirat e gjera alpine ofrojnë pamje mbresëlënëse, ndërsa ajri i pastër malor e bën përvojën edhe më të veçantë.
Parku Kombëtar i Shebenikut, i njohur për biodiversitetin e pasur dhe bukuritë natyrore të rralla, shndërrohet në dimër në një skenë përrallore, ku dëbora thekson madhështinë e relievit dhe qetësinë e natyrës së paprekur. Kjo zonë po kthehet gjithnjë e më shumë në një destinacion të preferuar për vizitorët vendas dhe të huaj, që kërkojnë arratisje nga zhurma e qytetit dhe kontakt të drejtpërdrejtë me natyrën.
Ardit Kullafi, Drejtor i Administratës Rajonale të Zonave të Mbrojtura Elbasan, thekson se pamjet dimërore të Fushë Studenit dhe Parkut Kombëtar të Shebenikut janë një dëshmi e vlerave të jashtëzakonshme natyrore që mbart kjo zonë.
“Shebeniku dhe Fushë Studen, të mbuluara nga dëbora, shfaqin një bukuri magjepsëse dhe autentike, që i fton vizitorët të përjetojnë turizmin malor dimëror në formën e tij më të pastër. Këto ditë dimri e shndërrojnë parkun në një laborator natyror qetësie, aventurë dhe reflektimi, ku natyra ruan harmoninë e saj të paprekur.”
Ai shton se Administrata Rajonale e Zonave të Mbrojtura Elbasan vijon punën për mbrojtjen e ekosistemeve dhe promovimin e një turizmi të qëndrueshëm:
“Çdo vizitë në këto territore është një mundësi për të njohur nga afër pasuritë natyrore, por edhe për t’i ruajtur ato për brezat që do të vijnë. Shebeniku në dimër është një thesar që duhet përjetuar me respekt dhe dashuri për natyrën.”
Fushë Studen dhe Parku Kombëtar i Shebenikut dëshmojnë edhe një herë se Librazhdi është një thesar i vërtetë turistik, veçanërisht në ditët e dimrit, ku bukuria natyrore dhe magjia e dëborës krijojnë pamje që do të mbeten gjatë në kujtesën e çdo vizitori.
