Dasma e djalit të Jozefina Topallit, e cila u mbajt këtë fundjavë në Itali, është bërë shpejt virale në rrjetet sociale.
Lumë komentesh dhe urimesh janë drejtuar në adresën e Instagramit të ish-kryeparlamentares, e cila ka publikuar foton e të birit dhe nuses në ditën e ceremonisë.
“Në Bazilikën e Shën Marisë të Altarit të Qiejve, në Romë, Genari dhe Cindy kurorëzuan dashurinë e tyre. Si nënë, ky ishte një moment i paharrueshëm, plot emocion e mirënjohje. Uroj që martesa e tyre të jetë gjithmonë e mbushur me dashuri, respekt e bekim nga Zoti,” shkruan Topalli.
Por ka pasur edhe shumë komente që kanë vënë në dukje luksin e kësaj dasme, madje duke aluduar edhe shifrën që ka kushtuar i gjithë organizimi.
Një prej komentuesve madje i bën thirrje Ministrisë së Drejtësisë që të nise hetimet për paratë e shpenzuara në këtë dasmë, që sipas tij kap shifrat e 500 mijë eurove.
“Ministria e Drejtësisë, bëni verifikimet se nuk ka kuptim të bësh dasmë 500 mijë euro,” shkruan komentuesi.
“Si nuk të vjen zor, nuk ke sedër fare para në popullin e varfër që çdo ditë rinia merr arratinë, hajdutët pa pikë mëshire hellin vadhe me para të vjellura,” shkruan një komentues tjetër.
“Sa ka kushtuar vallë kjo dasmë? Me lekët e kujt?” pyet një tjetër.
“Sa lluks i shfrenuar, çifti të trashëgohet, por shumë e tepër çdo gjë,” është një tjetër koment.
Ndërkohë, Topalli nuk i është përgjigjur asnjë prej komenteve.
