Nga Etleva Rrapa
Më 22 nëntor, në komunën e Pistoia-s u zhvillua takimi zyrtar mes kryebashkiakut Alessandro Tommasi dhe kryetares së Bashkisë së Lushnjes, znj. Eriselda Sefa. Takimi kulmoi me nënshkrimin e paktit të miqësisë midis dy qyteteve, një hap i rëndësishëm drejt bashkëpunimit institucional, kulturor dhe ekonomik.
Ky zhvillim nuk lindi sot. Pas më shumë se dy vitesh përgatitjesh, iniciativash dhe shkëmbimesh, procesi arriti finalizimin e tij zyrtar.
Nga kërkesa fillestare te nënshkrimi historik
Më 18 tetor 2023, znj. Etleva Rrapa dorëzoi pranë komunës së Pistoia-s një kërkesë zyrtare për krijimin e një “ure miqësie” mes qytetit të saj dhe Lushnjes. Letra iu dorëzua kryebashkiakes Sefa nga vetë znj. Rrapa dhe znj. Monica Micheli Panozzo – një veprim që hapi rrugën për procesin e sotëm të bashkëpunimit.
Si shenjë vlerësimi, dy vjet më parë kryetarja Sefa mori letrën zyrtare të bashkëpunimit nga Tommasi, ndërsa në korrik 2024 u ftua si e ftuar nderi në një prej eventeve më historike të rajonit, “Giostra del Orso”, një ngjarje me mbi 600 vjet traditë.
Gjatë asaj vizite, dy homologët ngritën bazat e një plani njohjeje reciproke midis dy qyteteve ,një proces që vazhdoi me vizitën e datës 21 janar 2024, ku në Lushnje mbërritën dy assessorët pistojezë, Alessandro Sabella dhe Benedetta Menicheli, me rastin e festimit të Kongresit të Lushnjes.
Pistoia njeh potencialin e Myzeqesë
Dy assessorët italianë u njohën nga afër me potencialin bujqësor, turistik dhe mundësitë e investimit italian në zemrën e Myzeqesë. Bisedimet administrative forcuan bindjen se bashkëpunimi midis dy qyteteve mund të jetë i frytshëm, veçanërisht në sektorë kyç të zhvillimit lokal.
Delegacioni shqiptar i mirëpritur zyrtarisht në Pistoia
Në vijim të këtyre hapave, delegacioni shqiptar i përbërë nga përfaqësues të pozitës dhe opozitës u prit zyrtarisht në Bashkinë e Pistoia-s më 22 nëntor. Mesazhi i përbashkët ishte i qartë: paktet e miqësisë i përkasin qytetarëve dhe të ardhmes së tyre, jo vetëm politikës.
Vizita përkoi edhe me nisjen e festimeve të Krishtlindjeve në qytet, ku delegacioni shqiptar mori pjesë si i ftuar special.
Mirënjohje për rolin e Pistoia-s dhe komunitetit shqiptar
Një falënderim i veçantë iu drejtua zotit Paolo Bresci, ish-drejtues i Zyrës së Turizmit në Pistoia, i cili besoi në këtë projekt dhe punoi me përkushtim për ta konkretizuar.
Gjatë takimit të rëndësishëm ishin gjithashtu të pranishëm:
Shefi i kabinetit, z. Giorgio Zuccherini,
Përfaqësuesit e TVL Pistoia,
Media lokale italiane.
Kryebashkiaku Tommasi vuri theks të veçantë tek komuniteti shqiptar në Pistoia, i cili numëron mbi 13,000 banorë dhe përbën një pjesë thelbësore të jetës së qytetit.
Deklarata e kryebashkiakes Sefa: “Një sinjal i qartë europian”
Nga ana e saj, kryetarja e Bashkisë së Lushnjes, znj. Eriselda Sefa, e cilësoi nënshkrimin e paktit si një akt të rëndësishëm jo vetëm për bashkinë që drejton, por për gjithë komunitetin lushnjar.
“Kjo firmë është një mesazh i qartë bashkëpunimi ndërinstitucional dhe një hap drejt integrimit europian. Tregon se politika, kur bashkohet për të mirën e qytetit, mund të arrijë rezultate konkrete”, u shpreh ajo.
Një kapitull i ri për të dy qytetet
Me nënshkrimin e paktit të miqësisë, Pistoia dhe Lushnja hapin një kapitull të ri bashkëpunimi, duke synuar projekte të përbashkëta në fushat e kulturës, turizmit, ekonomisë dhe shkëmbimeve mes qytetarëve.
Ky hap përbën një shembull të qartë se diplomacia lokale mund të ndërtojë ura të forta miqësie ,ura që i rezistojnë kohës dhe sjellin zhvillim të ndërsjellë.
