Pasditen e së mërkurës, Real Madrid publikoi një komunikatë zyrtare ku njoftoi se do të kërkojë dëmshpërblim nga UEFA për dëmet e shkaktuara në çështjen e Super League. Ky qëndrim erdhi pas vendimit të Gjykatës së Madridit, e cila rrëzoi apelin e bërë nga FIFA dhe UEFA, duke konfirmuar vendimin e Gjykatës Evropiane të Drejtësisë. Sipas këtij vendimi, të dy organizatat kishin abuzuar me pozicionin e tyre dominues në tregun e futbollit evropian.
Të enjten, në median spanjolle u përmend edhe shuma që pritet të kërkojë Real Madrid së bashku me A22, promotori i Super League. Sipas AS, avokatët e klubit dhe të A22 kanë nisur tashmë punën për përgatitjen e kërkesës për dëmshpërblim, ndërsa vlera e pretenduar thuhet të jetë rreth 4.5 miliardë euro. Kjo shumë lidhet me dëmet e shkaktuara, fitimet e humbura dhe dëmtimin e reputacionit.
Përpara se të ndërmerrnin hapat ligjorë, Real Madrid dhe A22 zhvilluan dhjetëra takime me UEFA në përpjekje për të gjetur një marrëveshje për zbatimin e vendimit të Gjykatës së Drejtësisë. Fillimisht, negociatat avancuan pozitivisht, sidomos për çështjet e menaxhimit të kompeticionit dhe modelit televiziv, por palët nuk arritën dakordësi për formatin e turneut.
Në përfundim, Real Madrid dhe A22 vlerësuan se UEFA nuk kishte pasur asnjëherë qëllim të arrinte një marrëveshje, por vetëm të fitonte kohë për të penguar krijimin e Super League. Në këtë situatë, sipas tyre, opsioni më i arsyeshëm ishte kërkimi i dëmshpërblimit, në përputhje me praktikat e Bashkimit Evropian për çështjet që lidhen me abuzimin e monopolit në treg.