Në kuadër të festës së 8 Marsit, qyteti i Librazhdit u kthye në një qendër të rëndësishme të artit dhe kulturës shqiptare përmes manifestimit tashmë tradicional “Gratë në Kulturë”, një aktivitet i veçantë që këtë vit shënoi edicionin e tij të pestë jubilar. Ky manifestim, i konceptuar si një uratë dhe bekim shpirtëror për nënat dhe gratë kudo në botë, solli në një skenë figura të shquara të artit, kulturës dhe jetës publike nga të gjitha trevat shqiptare.
Në këtë edicion jubilar, drejtimin artistik të aktivitetit e mbajti tenori i njohur shqiptar Shkodran Tolaj, i cili theksoi se “Gratë në Kulturë” është një manifestim unik i dedikuar mësueses dhe nënës shqiptare, dy figurave që kanë luajtur një rol thelbësor në edukimin dhe zhvillimin e shoqërisë. Në këtë aktivitet u bashkuan personalitete të spikatura nga fusha të ndryshme të artit dhe kulturës, duke përfshirë baletin, operën, artin dramatik, pianon, poezinë, humanizmin dhe këngën tradicionale shqiptare.
Një nga veçoritë më të bukura të këtij manifestimi ishte gërshetimi i tre gjeneratave të grave të suksesshme të jetës publike shqiptare. Në skenën e Librazhdit u ngjitën personalitete të shquara si veprimtarja dhe shkrimtarja kosovare Flora Brovina, ikonat e skenës muzikore shqiptare Shpresa Gashi dhe Irma Libohova, si dhe një nga figurat themeluese të baletit kosovar Sabrije Spahiu. Po ashtu, pjesë e këtij manifestimi ishte edhe libretistja e operës së parë kosovare Ajmone Dhomi, humanistja e njohur nga Librazhdi Zela Koka, primadona e operës shqiptare Marjana Leka dhe pianistja e njohur dhe profesoresha universitare Rudina Ciko.
Energjia rinore nuk mungoi në këtë aktivitet, ku balerina Diellza Berisha dhe grupi koral i vajzave dardane sollën një atmosferë të veçantë artistike, duke përfaqësuar me krenari qytete dhe treva të ndryshme shqiptare si Vitia, Kaçaniku, Tetova, Kërçova, Prilepi dhe Kumanova. Kjo e bëri manifestimin një aktivitet gjithëpërfshirës që bashkoi kulturën shqiptare përtej kufijve.
Emocionet në sallë arritën kulmin edhe përmes performancave muzikore. Këngëtarja Hatixhe Lushi interpretoi një këngë kushtuar nënës, duke prekur zemrat e të pranishmëve, ndërsa Mjeshtri i Madh i këngës shqipe Naim Gjoshi së bashku me Irma Libohova interpretuan këngën “Kosova, Kosova”, një moment që ngriti publikun në këmbë dhe u shoqërua me duartrokitje të gjata.
Manifestimi “Gratë në Kulturë” solli jo vetëm art dhe muzikë, por edhe rrëfime frymëzuese nga jeta dhe rrugëtimi i grave në arsim, kulturë dhe shoqëri. Përmes këtyre historive u përcoll një mesazh i fortë mbi rolin e pazëvendësueshëm të gruas në zhvillimin e shoqërisë shqiptare.
Një risi e këtij edicioni ishte edhe prezantimi për herë të parë i logos zyrtare të manifestimit, e cila përfaqëson fytyrën e gruas ilire të gdhendur në monedhë. Ky simbol mbart një mesazh të fortë historik: gruaja shqiptare ka qenë gjithmonë jo vetëm shtylla e familjes, por edhe një figurë e rëndësishme e jetës shoqërore dhe publike në të gjitha periudhat e historisë.
Në përfundim të aktivitetit, Kryetari i Bashkisë së Librazhdit Mariglen Disha u vlerësua për mikpritjen dhe mbështetjen e tij ndaj këtij manifestimi, ndërsa secila nga personalitetet pjesëmarrëse u nderua me çertifikata mirënjohjeje për kontributin e tyre në kulturë dhe shoqëri.
Një rol të rëndësishëm në realizimin e këtij aktiviteti pati edhe moderatorja dhe ideatorja e manifestimit Besiana Mehmedi, së bashku me stafin e Bashkisë së Librazhdit dhe Pallatit të Kulturës, të cilët bënë të mundur që festat e 7 dhe 8 Marsit të shënoheshin me një aktivitet që pritet të lërë gjurmë të rëndësishme në jetën kulturore të qytetit.
Manifestimi “Gratë në Kulturë” konfirmoi edhe një herë se Librazhdi po shndërrohet në një pikëtakim të rëndësishëm të artit dhe kulturës shqiptare, duke nderuar figurën e nënës dhe gruas shqiptare dhe duke përcjellë një mesazh të fuqishëm për vlerat, sakrificat dhe kontributin e tyre në shoqëri.
