Kombëtarja shqiptare do të mbyllë kualifikueset e Botërorit 2026 me sfidën ndaj Anglisë në Air Albania Stadium. Me këtë rast, Policia e Shtetit bashkë me Federatën Shqiptare të futbollit kanë ndërmarrë disa masa dhe kanë përcaktuar udhëzimë për mbarëvajtjen e kësaj ndeshjeje dhe për të garantuar sigurinë e tifozëve.
Kështu Federata Shqiptare e Futbollit bën të ditur se ditën e ndeshjes stafi i Air Albania Stadium do të vendosë tabela orientuese në perimetrin e jashtëm të stadiumit, për të ndihmuar tifozët të gjejnë më lehtë hyrjen dhe tribunën përkatëse sipas biletës që kanë blerë. Po kështu në pikat e hyrjes së impiantit do të vendosen kosha për të grumbulluar sendet e ndaluara që mund të pikasen gjatë kontrollit fizik të tifozëve. Gjithashtu do të bëhet edhe grumbullimi i monedhave dhe sendeve të tjera të vogla, kjo nga përfaqësuesit e Kryqit të Kuq
Ndërkaq, janë përcaktuar edhe rregullat e hyrjes në stadium:
Të gjithë tifozët duhet të jenë të pajisur me biletën përkatëse.
Nuk do të lejohet futja e fëmijëve pa biletë, pavarësisht moshës, në mënyrë që të shmanget mbipopullimi dhe bllokimi i shkallëve gjatë ndeshjes.
Në të njëjtën kohë paralajmërohen tifozët se biletat e dublikuara ose të falsifikuara nuk do të njihen nga sistemi elektronik i stadiumit, dhe poseduesit e tyre nuk do të lejohen të hyjnë.
Portat e stadiumit do të hapen tre orë përpara fillimit të ndeshjes, ndaj FSHF dhe Policia e Shtetit u bëjnë thirrje tifozëve të mbërrijnë në kohë, të ndjekin udhëzimet e rendit dhe të drejtohen drejt tribunës së përcaktuar në biletën e tyre.
