Kisha e Shën Todrit në Kadipashaj të Lushnjës po rikthehet në jetë përmes punimeve restauruese me kujdes dhe profesionalizëm. Restaurimi konsolidon strukturën, rifreskon elementet arkitekturore dhe vendos sistem drenazhi që e mbron nga dëmtimet.
Nën mbikëqyrjen e specialistëve të Institutit Kombëtar të Trashëgimisë Kulturore, restaurimi synon ruajtjen e vlerave historike dhe shpirtërore, duke rikthyer kishën si një hapësirë të gjallë të identitetit kulturor të komunitetit.
Kisha daton rreth vitit 1300, duke e bërë një nga kishat më të vjetra të Myzeqesë. Fillimisht ka pasur një manastir, ndërsa kisha u ndërtua më vonë. Ajo ruan afreske të çmuara dhe ka statusin e Monumenti Kulturor, Kategoria I, e periudhës pasbizantine, e tipit bazilikal, me piktura nga vëllezërit Çetiri.
Përveç strukturës, po restaurohet ikonostasi, piktura murale dhe tavan druri i naosit, i veçantë në llojin e tij. Naosi ka përmasa 14×8,40 m, ndarë me dy radhë kolonash druri në tre nefe, dhe tavan dërrase me një thellim që imiton kupolën qendrore.
Kisha e Shën Todrit konsiderohet e dyta për nga vjetërsia pas manastirit të Ardenicës dhe dallon nga kishat e tjera të Myzeqesë për ndarjen e qartë të pjesëve: naosi, narteksi dhe hajati.
