Drejtoria e Mjedisit në Bashkinë Elbasan organizoi në Ditën e Verës një aktivitet simbolik me në qendër ndërgjegjësimin për mbrojtjen e natyrës.
Përpara Bashkisë së Elbasanit u krijua “Këndi i Premtimeve për Mjedisin”, një hapësirë ku qytetarë të moshave të ndryshme patën mundësinë të shprehnin angazhimin e tyre për të kontribuar në mbrojtjen e mjedisit.
Në këtë aktivitet morën pjesë dhe vendosën premtimet e tyre për mjedisin Zëvendëskryeministrja Albana Koçiu, Kryetari i Bashkisë Gledian Llatja, Arbjan Mazniku, si dhe deputetët e qarkut Elbasan.
Fëmijë, të rinj dhe qytetarë të shumtë u bënë pjesë e këtij momenti simbolik, duke përcjellë mesazhin se çdo ndryshim i madh për mjedisin nis nga ndërgjegjësimi dhe veprimet e vogla të përditshme.
Drejtoresha e Mjedisit në Bashkinë Elbasan, Lorena Haxhiymeri, theksoi se nisma të tilla synojnë të rrisin ndërgjegjësimin qytetar dhe të forcojnë kulturën e kujdesit ndaj natyrës, duke i kthyer premtimet për mjedisin në veprime konkrete për një qytet më të pastër dhe më të gjelbër.
