Në një sezon të fortë dhe të paparashikueshëm, ku diferencat mes ekipeve janë minimale dhe gara mbetet e hapur, Elbasani ka ditur të ruajë stabilitetin dhe të qëndrojë vazhdimisht pranë kreut. Ish-trajneri i verdhebluve, Anxhelo Suta, vlerëson ecurinë e skuadrës, punën e stafit teknik dhe drejtues, si edhe shpreh bindjen se ekipi ka potencial për të qenë pjesë e “Final 4”. Për ndeshjen ndaj Vllaznisë, ai shfaqet optimist për një rezultat pozitiv.
Elbasani brenda objektivave
Sipas Sutës, verdheblutë janë në rrugën e duhur dhe nuk kanë pasur lëkundje serioze gjatë sezonit. Ai thekson se skuadra ka qenë gjithmonë pranë majës dhe kjo është shenjë stabiliteti:
“Elbasani është brenda objektivave dhe kjo ka rëndësi në këtë fazë. Që nga starti i kampionatit e deri tani, skuadra nuk ka qenë asnjëherë larg kreut. Kjo tregon që grupi ka vazhdimësi dhe nuk ka rënie.”
Meritat e stafit: Guranjaku dhe Gvozdenoviç
Ish-trajneri ndalet te puna e drejtuesve dhe stafit teknik, duke theksuar rolin kyç të drejtorit sportiv dhe trajnerit:
“Drejtori Elton Guranjaku ka bërë një punë shumë të mirë në përzgjedhjen e lojtarëve, duke ndërtuar një skuadër me ekuilibër dhe cilësi. Nga ana tjetër, trajneri Gvozdenoviç ka ditur ta kompozojë dhe ta stabilizojë ekipin. Është një dyshe që po funksionon.”
Presioni dhe reagimi i skuadrës
Suta e sheh pozitivisht edhe faktin që trajneri ka pranuar publikisht presionin:
“Nuk është sinjal i keq. Përkundrazi, është shenjë karakteri. Kur një trajner pranon presionin, tregon ndershmëri. Fakti që ekipi reagoi pas atyre momenteve, tregon se ka lidhje të fortë mes stafit dhe lojtarëve.”
Barazimet nuk janë alarm
Për rezultatet e fundit, ai shprehet i qetë, duke theksuar se kampionati është i vështirë për të gjithë:
“Barazimet nuk janë shqetësuese. Kampionati është shumë i fortë dhe të gjitha ekipet po hasin vështirësi. E rëndësishme është që Elbasani nuk bie psikologjikisht dhe di të reagojë.”
Objektivi ‘Final 4’
Suta është i bindur se skuadra ka gjithçka për të qenë mes katër më të mirave:
“E shoh absolutisht Elbasanin pjesë të ‘Final 4’. Skuadra ka pjekurinë, ekuilibrin dhe seriozitetin për t’u kualifikuar. Ka ulje-ngritje në çdo sezon, por ky ekip di ta ruajë ritmin.”
Ndeshja me Vllazninë
Për përballjen e radhës, ai kërkon qetësi dhe jo presion të tepërt:
“Nuk është finale dhe nuk duhet bërë presion i panevojshëm. Por është një ndeshje e rëndësishme për vazhdimësinë dhe moralin. Elbasani mund të marrë rezultat pozitiv dhe pse jo, edhe fitoren.”
Mesazhi për skuadrën
Në fund, Suta ka edhe një këshillë të qartë për grupin:
“Të mos ngarkohen dhe të luajnë me qetësi. Ky kampionat kërkon gjakftohtësi. Nëse Elbasani qëndron pranë kreut deri në fund, çdo gjë është e mundur.”
