Investimet e kompanive shqiptare jashtë vendit po rriten për të pestin vit radhazi, duke arritur nivele rekord. Sipas të dhënave të Bankës së Shqipërisë, në gjashtëmujorin e parë të këtij viti ato kapën vlerën e 160 milionë eurove, një rritje prej 12.7% krahasuar me të njëjtën periudhë të vitit të kaluar.
Ky është niveli më i lartë historik i kapitalit shqiptar të investuar jashtë vendit. Pjesa më e madhe e tyre lidhet me injektim kapitali në shoqëritë e kontrolluara nga bizneset shqiptare jashtë kufijve, mbi 60% e totalit. Pjesa tjetër janë fitime të riinvestuara ose hua nga aksionarët shqiptarë për filialet e tyre.
Ndërkohë, bilanci neto i investimeve të huaja direkte në Shqipëri për 6-mujorin 2025 ishte negativ me 599 milionë euro, çka tregon se hyrjet e kapitalit të huaj mbeten shumë më të larta se daljet. Megjithatë, diferenca është ngushtuar me 1.8% krahasuar me vitin e kaluar, falë ritmeve më të shpejta të rritjes së investimeve shqiptare jashtë vendit.
Edhe pse statistikat nuk japin shpërndarje gjeografike apo sektoriale, është e qartë se prania e grupeve të mëdha shqiptare në tregjet e huaja po zgjerohet. Balfin Group ka tashmë një portofol prej 100 milionë eurosh në Austri, me synimin për ta çuar në 200 milionë, dhe është aktiv në Zvicër, SHBA e Kanada. Po ashtu, Grupi Kastrati ka hyrë në tregun amerikan me blerjen e DUA Hotel Miami.
Kosova mbetet destinacioni kryesor i kapitalit shqiptar jashtë vendit. Të dhënat e Bankës Qendrore të Kosovës tregojnë se deri në fund të marsit 2025, stoku i investimeve shqiptare atje arriti në 490 milionë euro, duke e renditur Shqipërinë si investitorin e pestë më të madh në Kosovë.
Ky trend pasqyron një ndryshim të rëndësishëm: bizneset shqiptare nuk janë më vetëm pritëse të kapitalit të huaj, por po shndërrohen në investitorë të rëndësishëm në rajon dhe më gjerë. MONITOR