Ilir Daja është trajneri që kudo ku shkon, lë gjurmë të pashlyeshme. Ai nuk njihet thjesht për trofetë që ka fituar, por për mentalitetin fitues që mbjell në çdo skuadër. Që nga titujt kampion në Shqipëri e deri te sukseset e bujshme në arenën europiane, Daja ka ndërtuar gjithmonë ekipe që nuk dorëzohen kurrë dhe që guxojnë të ëndërrojnë më shumë.
Me Skënderbeun ai realizoi një nga ecuritë më të paharrueshme të një skuadre shqiptare në kompeticionet europiane, duke e çuar ekipin korrentar deri në fazën e grupeve të Europa League dhe duke sfiduar kundërshtarë të mëdhenj me lojë të matur dhe të organizuar. Më pas, edhe me Ballkanin e Kosovës, Daja shkroi histori duke e kthyer klubin nga Suhareka në një emër të njohur në skenën europiane, falë paraqitjeve dinjitoze dhe kualifikimeve surprizë.
Sot, është radha e Dinamos për të përjetuar këtë filozofi fituese. Nën drejtimin e tij, “blutë” e kryeqytetit jo vetëm që janë rikthyer në elitën e futbollit shqiptar, por kanë kaluar tur pas turi në Conference League, duke siguruar një kualifikim historik në “play-off”. Një arritje që tregon se stili i punës së Dajës – kombinimi i disiplinës, organizimit dhe besimit të plotë – funksionon kudo.
Karriera e Ilir Dajës është dëshmi se suksesi nuk vjen rastësisht. Ai di të ndërtojë projekte të qëndrueshme, të nxjerrë maksimumin nga lojtarët dhe t’i kthejë skuadrat e tij në një makineri gare. Pas Skënderbeut dhe Ballkanit, edhe Dinamo është shembulli i radhës i këtij mentaliteti fitues, që e bën trajnerin kryeqytetas një nga emrat më të suksesshëm në historinë e futbollit shqiptar.
albaniaexpress.al
