Gramshi përjetoi sot një nga ditët më të bukura sportive, ku emocioni, krenaria dhe mirënjohja u ndërthurën në një atmosferë të rrallë festive. Pallati i sportit u mbush plot me tifozë, ndërsa në qendër të vëmendjes ishin vajzat e volejbollit, të cilat jo vetëm që dhuruan spektakël në fushë, por edhe fituan me meritë përballë skuadrës së Tiranës.
Gjithçka nisi me një gjest fisnik e frymëzues nga “Qytetari i Nderit” i Gramshit, ing. Skënder Lena, i cili dhuroi uniforma të reja dhe bazë materiale për ekipin. Një kontribut që solli jo vetëm buzëqeshje, por edhe motivim të jashtëzakonshëm për vajzat e reja, duke e kthyer këtë ditë në një festë të vërtetë për gjithë qytetin.
Nën drejtimin e trajneres pasionante Najada Velça, skuadra tregoi karakter, përkushtim dhe ambicie, duke dhënë një sinjal të qartë se në Gramsh po lind një brez i ri talentesh. Gëzimi dhe emocionet ishin të dukshme, pasi përveç fitores, vajzat morën edhe një përgjegjësi të re: të punojnë më fort për të ngjitur shkallët e suksesit.
Momenti kulmor ishte ndarja e kupave, ku njëra prej tyre mbante emrin e yllit të volejbollit shqiptar që shkëlqen në arenën europiane, Erblira Bici. Kjo kupë u fitua nga talentja gramshiote me numrin 3, Klejda Kokomesi, dhe iu dorëzua nga legjenda e rrjetës, Leonard Tase, në një moment që u duartrokit gjatë nga të pranishmit.
Ky aktivitet dëshmoi se Gramshi po kthehet në një fidanishte të re talentesh, një zhvillim që kërkon më shumë mbështetje nga institucionet dhe komuniteti. Shembulli i Skënder Lenës mbetet një thirrje e fortë për më shumë solidaritet dhe investim në rininë sportive.
Sot nuk u festua vetëm një fitore – u festua shpresa, pasioni dhe e ardhmja e një qyteti që beson te vajzat e tij.
