Drejtoresha e Përgjitshme e News24, Anila Jole, vlerëson vendimin e sotëm të Gjykatës, teksa vendosi rikthimin në studio dhe redaksi të gazetarëve, duke vendosur si të paligjshëm sekuestrimin e kompjuterave dhe orendive.
Sipas Joles, ishte një mesazh i qartë ky për ata që bënë paligjshmëri dhe për ushtrinë e komentuesve që vollën vrer me të qena e të paqena.
ANILA JOLE: “Ashtu siç e shpreha disa herë publikisht këto ditë, unë e ndieja dhe besoja se ne (News24) kishim të drejtë dhe do ta gjenim atë. Sot Gjykata vendosi rikthimin tonë në studio dhe redaksi dhe vlerësoi të paligjshëm sekuestrimin e kompjuterave dhe orendive.
News 24 për pak orë ridel në transmetim dhe për këtë jemi të gjithë shumë të lumtur.
Besova që ka drejtësi, dhe ashtu doli!
Historia e kontratës së godinës sonë është në gjyq, per faj të ministrisë që e dha atë me qira dhe bëri një lëmsh mes qiradhënësve, qiramarrësve dhe pronarëve të tokës, lëmsh që shpresoj të gjendet sërish një gjyqtare me integritet si ajo e sotmja, për t’ia gjetur fillin. Këtë histori, kini durim ta sqarojnë profesionistët në ditët në vijim.
News24 do të vijojë të jetë pranë atyre që e ndjekin dhe duan me besim e sinqeritet!
