Një mbrëmje plot emocione dhe gola në Kualifikueset e Botërorit 2026, ku skuadrat e mëdha evropiane zbritën në fushë për të konfirmuar pretendimet e tyre.
Në Grupin A, Gjermania u rikthye te fitorja pas një periudhe jo të mirë, duke mposhtur bindshëm Luksemburgun me rezultatin 4-0. Skuadra e Julian Nagelsmann mori kështu kreun e grupit, ndërsa Irlanda e Veriut mundi Sllovakinë 2-0, duke u ngjitur në vendin e dytë.
Në Grupin B, Zvicra vazhdon e sigurt rrugën drejt Botërorit. Një penallti e realizuar nga Granit Xhaka dhe një gol në fund nga Manzambi i dhanë “helvetëve” një fitore të rëndësishme 2-0 në transfertë ndaj Suedisë, sukses që ndihmon edhe Kosovën, e cila barazoi 0-0 me Slloveninë.
Franca nuk zhgënjen në Grupin D, duke marrë një tjetër fitore të pastër 3-0 ndaj Azerbajxhanit, me Mbappé, Rabiot dhe Thauvin në rolin e protagonistëve. Ndërkohë, ndeshja tjetër e grupit dhuroi spektakël, pasi Ukraina triumfoi 5-3 në transfertë ndaj Islandës.
Surpriza e madhe e mbrëmjes erdhi në Grupin J, ku Maqedonia e Veriut vijon të shkruajë histori. Skuadra e trajnerit Blagoja Milevski mori një barazim të artë 0-0 ndaj Belgjikës në Gent, duke ruajtur kreun e grupit me 12 pikë dhe mbetur pa humbje pas pesë ndeshjesh. Në ndeshjen tjetër të këtij grupi, Kazakistani fitoi me goleadë 4-0 ndaj Lihtenshteinit.
Rezultatet e plota:
Grupi A
Gjermani 4–0 Luksemburg
Irlandë e Veriut 2–0 Sllovaki
Grupi B
Suedi 0–2 Zvicër
Kosovë 0–0 Slloveni
Grupi D
Francë 3–0 Azerbajxhan
Islandë 3–5 Ukrainë
Grupi J
Belgjikë 0–0 Maqedoni e Veriut
Kazakistan 4–0 Lihtenshtein
