Një zbulim i rrallë shkencor ka ardhur nga vargmalet e Andeve në Argjentinë, ku një ekip paleontologësh nga instituti publik i kërkimit Conicet ka gjetur skeletin pothuajse të plotë të një specie të re dinosauri, të quajtur Huayracursor jaguensis.
Skeleti u zbulua në një lartësi prej rreth 3.000 metrash në provincën e La Riojas, duke u cilësuar si një nga gjetjet më të rëndësishme të dekadës për studimin e evolucionit të dinosaurëve.
Sipas ekspertëve, kjo specie ka jetuar rreth 230 milion vjet më parë, në fund të periudhës Triasike – një fazë kyçe e historisë së Tokës kur u shfaqën dinosaurët e parë dhe paraardhësit e gjitarëve.
“Ne besojmë se Huayracursor është midis 230 dhe 225 milion vjeçare, çka e bën një nga dinosaurët më të vjetër të njohur deri më sot,” shpjegoi Agustin Martinelli, një nga autorët e studimit.
Ndryshe nga gjigantët e mëvonshëm të periudhës Jurassic, kjo specie ishte relativisht e vogël, me një gjatësi rreth dy metra dhe peshë rreth 18 kilogramë. Ajo i përket një linje dinosaurësh barngrënës me qafë të gjatë, të cilët më vonë evoluan në forma shumë më të mëdha.
Skeleti i gjetur përfshin një pjesë të kafkës, shtyllën kurrizore të plotë deri në bisht, si dhe gjymtyrët e përparme dhe të pasme, çka e bën një ndër fosilet më të kompletuar të këtij lloji.
Shkencëtarët e Conicet theksojnë se ky zbulim do të shërbejë si referencë e rëndësishme për studimet mbi origjinën dhe evolucionin e dinosaurëve, duke ndihmuar në kuptimin e mënyrës se si këto krijesa të lashta u përhapën nëpër planet.
