Forcat amerikane kanë kryer një tjetër sulm ndaj një anijeje të dyshuar për trafik droge, këtë herë në ujërat ndërkombëtare të Oqeanit Paqësor, ka konfirmuar Pentagoni.
Sipas sekretarit amerikan të Mbrojtjes, Pete Hegseth, në bord ndodheshin dy persona, të cilët u vranë gjatë sulmit. Asnjë ushtar amerikan nuk është lënduar.
Mjeti lundrues ishte i njohur për shërbimet amerikane të inteligjencës dhe besohej se po transportonte drogë përgjatë një rruge të njohur të trafikut në ujëra ndërkombëtare.
Ky është sulmi i tëtë i Shteteve të Bashkuara ndaj mjeteve detare të dyshuara për trafik droge që nga data 2 shtator, por është hera e parë që ndodh në Oqeanin Paqësor.
Në një video të publikuar nga Pentagoni, shihet një gomone e gjatë, me ngjyrë blu, që lëviz me shpejtësi në det përpara se të goditet nga një armë e drejtuar nga forcat amerikane.
“Narco-terroristët që synojnë të helmojnë brigjet tona nuk do të gjejnë strehë të sigurt askund në hemisferën tonë,” shkroi Hegseth në rrjetin social X.
“Ashtu si Al Qaeda i shpalli luftë atdheut tonë, edhe këto kartele po zhvillojnë një luftë ndaj kufirit dhe popullit tonë. Nuk do të ketë strehim apo falje – vetëm drejtësi.”
Sipas një memorandumi të klasifikuar të dërguar së fundmi në Kongresin Amerikan, administrata e Presidentit Donald Trump ka përcaktuar se SHBA është e përfshirë në një “konflikt të armatosur jo ndërkombëtar” me organizatat e trafikut të drogës.
Që nga fillimi i operacioneve, të paktën 36 persona janë vrarë në sulmet amerikane ndaj mjeteve të dyshuara të trafikut të drogës. Një nga sulmet e fundit ndodhi ndaj një mjeti gjysmë-nëndetësor në Detin e Karaibeve.
Javën e kaluar, dy persona mbijetuan pas një sulmi tjetër dhe u riatdhesuan në Kolumbi dhe Ekuador. Autoritetet ekuadoriane më vonë liruan njërin prej tyre – të identifikuar si Andrés Fernando Tufiño – duke deklaruar se nuk kishte prova për përfshirje në krime. Personi tjetër nga Kolumbia raportohet se vazhdon të jetë i shtruar në spital.
Administrata e Trump ka mbrojtur vazhdimisht këto operacione, duke i cilësuar si masa të domosdoshme kundër trafikut të drogës, ndërsa disa nga kartelet janë shpallur zyrtarisht organizatë terroriste nga SHBA.
Megjithatë, vendndodhja e saktë e sulmit më të fundit dhe origjina e mjetit të goditur nuk janë bërë ende publike.
Lajmi vjen në një moment tensionesh të rritura mes administratës Trump dhe presidentit të Kolumbisë, Gustavo Petro. Të dielën, Trump e quajti Petro një “lider të paligjshëm të drogës” që, sipas tij, “po nxit prodhimin masiv të drogës në gjithë territorin e Kolumbisë”.
Presidenti amerikan paralajmëroi se SHBA nuk do të ofrojë më subvencione për Kolumbinë, një nga aleatët më të afërt të saj në Amerikën Latine.
Sipas Agjencisë Amerikane të Luftës kundër Drogës (DEA), shumica e kokainës që arrin në qytetet amerikane kalon përmes rrugëve detare në Oqeanin Paqësor, përmes Amerikës Qendrore dhe Meksikës. Ndërkohë, sasia e sekuestruar në Karaibe – ku janë përqendruar shumica e sulmeve amerikane deri tani – mbetet më e vogël, por në rritje.
Për momentin, SHBA ka dhënë pak detaje mbi identitetin e personave të vrarë apo lidhjet e tyre të mundshme me organizatat e trafikut të drogës.
Rreth 10,000 trupa amerikane, si dhe dhjetëra avionë dhe anije luftarake, janë vendosur aktualisht në Karaibe si pjesë e këtij operacioni ndërkombëtar
