Flota aktive e mjeteve në Shqipëri arriti në mbi 1 milion në fund të tetëmujorit të vitit 2025, duke shënuar një rritje të ndjeshme prej 41,1% krahasuar me vitin 2020, sipas të dhënave të Drejtorisë së Përgjithshme të Shërbimeve të Transportit Rrugor (DPSHTRR).
Të dhënat tregojnë jo vetëm rritje sasiore, por edhe përmirësim cilësor të mjeteve në qarkullim, duke reflektuar orientimin e qytetarëve drejt automjeteve më të sigurta, më efikase dhe të pajisura me teknologji moderne. Gjatë tetë muajve të parë të këtij viti janë regjistruar 66.521 mjete të reja, një rritje prej 113% krahasuar me të njëjtën periudhë të vitit 2020.
Autoveturat përbëjnë 82,1% të regjistrimeve të reja, duke treguar një preferencë të qartë për mjete personale dhe urbane. Veçanërisht, mbi 13 mijë mjete të gjeneratës së fundit, të prodhuara brenda tre viteve të fundit, janë regjistruar gjatë këtij tetëmujori, një rritje prej 106% krahasuar me vitin 2020.