Presidenti i Turqisë, Tayyip Erdogan, ka vlerësuar përpjekjet dhe lidershipin e presidentit amerikan Donald Trump për të ndalur gjakderdhjen në Rripin e Gazës. Deklarata erdhi pas publikimit të një plani amerikan me 20 pika për paqen, i cili përfshin mbështetjen e kryeministrit izraelit Benjamin Netanyahu për propozimin.
Plani parashikon:
- Armëpushim të menjëhershëm
- Shkëmbim pengjesh midis Hamasit dhe të burgosurve palestinezë të mbajtur nga Izraeli
- Tërheqjen e Izraelit nga Gaza në faza
- Çarmatimin e Hamasit
- Krijimin e një qeverie tranzitore të udhëhequr nga një trup ndërkombëtar
Megjithatë, nuk është e qartë nëse Hamasi – grup i shpallur organizatë terroriste nga SHBA dhe BE – do ta pranojë këtë marrëveshje.
“Unë përshëndes përpjekjet dhe lidershipin e presidentit amerikan Donald Trump, të cilat synojnë ndalimin e gjakderdhjes dhe arritjen e një armëpushimi”, tha Erdogan, i cili javën e kaluar u takua me Trumpin në Shtëpinë e Bardhë për herë të parë pas gjashtë vjetësh. Ai shtoi se Turqia do të vazhdojë të kontribuojë për një paqe të drejtë, të qëndrueshme dhe të pranueshme për të gjitha palët.
Turqia ka qenë kritik i ashpër i ofensivës izraelite dyvjeçare në Gazë, duke e cilësuar si “gjenocid”. Gjatë këtij konflikti janë vrarë mbi 65.000 palestinezë, sipas autoriteteve shëndetësore në Gaza, ndërsa shumë banesa janë shkatërruar dhe mijëra njerëz janë zhvendosur. Lufta nisi pas një sulmi të Hamasit në jug të Izraelit, ku militantët vranë rreth 1.200 persona dhe rrëmbyen 251 të tjerë, sipas zyrtarëve izraelitë.
