Elbasani ka fituar titullin e Kampionit Kombëtar Ekipor për të Rritur në ping pong për vitin 2025. Finalja u karakterizua nga ndeshje të forta dhe emocionuese, ku ekipi elbasanas tregoi përgatitje të lartë dhe nivel konkurrimi solid, duke e siguruar kështu vendin e parë në kampionat.
Ekipi i femrave të Elbasanit gjithashtu tregoi performancë të mirë, duke u renditur në vendin e dytë në Kampionatin Kombëtar të të Rriturve 2025, një rezultat që tregon forcën dhe konsistencën e klubeve të qytetit në këtë disiplinë.
Trajnerë të ekipeve ishin znj. Greta Kovaçi dhe z. Gëzim Tosuni, ndërsa sportistët që kontribuan në fitoren e ekipit të meshkujve ishin Sadush Tosuni, Dorian Tapia, Enea Zenelhoxha dhe Marin Baholli. Sportisti i aktivitetit u shpall Sadush Tosuni, duke u dalluar për paraqitjet e tij të qëndrueshme dhe rezultatet vendimtare.
Ky sukses është një vijim i traditës së gjatë të Elbasanit në ping pong, një qytet që ka dhënë gjithmonë sportistë të shquar dhe ka pasur një rol të rëndësishëm në zhvillimin e kësaj disipline në Shqipëri.
Rezultatet e arritura këtë vit tregojnë se përgatitja dhe përkushtimi i sportistëve dhe trajnerëve të qytetit vazhdojnë të japin fryte në skenën kombëtare.
albaniaexpress.al
Të lumtë Greta Kovaçi!!Je krenaria e qytetit tonë !!