Elbasani e nisi sezonin e ri të Superiores me këmbën e mbarë, duke marrë një fitore të rëndësishme 1-0 përballë Flamurtarit në stadiumin “Elbasan Arena”. Një ndeshje e luftuar, ku verdheblutë u shpërblyen me tri pikët e para falë një presingu të lartë që detyroi kundërshtarin të gabojë.
Skuadra e drejtuar nga Ivan Gvozdenoviç tregoi qartë se synon të jetë e fortë dhe e organizuar që në fillim të kampionatit. Kapiteni Bruno Lulaj, në një intervistë ekskluzive për “Panorama Sport”, analizoi këtë nisje pozitive, duke folur për sekretin e fitores, ndryshimet në skuadër, punën në repartin difensiv dhe objektivat ambicioze të klubit, mes të cilëve edhe Kupat e Europës.
“Normalisht që jemi shumë të kënaqur, sepse kjo ishte ajo që kërkonim që në ditën e parë të fazës përgatitore. Donim ta nisnim kampionatin siç duhet, sepse siç thuhet, fillimi i mbarë është gjysma e punës”, tha Lulaj.
Ai shtoi se fitore të tilla japin moral dhe tregojnë se grupi ka më shumë eksperiencë se një vit më parë. Kapiteni gjithashtu paralajmëroi se sfida e radhës me Egnatian do të jetë një test i vërtetë për forcën e verdhebluve.
“Normalisht do të jetë një ndeshje e fortë, e luftuar dhe me shumë cilësi. Mos harrojmë që ata janë kampionët në fuqi, ndaj do t’i vlerësojmë maksimalisht. Por do të hyjmë në fushë për të marrë maksimumin”, u shpreh Lulaj.
Për sa i përket objektivave të sezonit, Lulaj theksoi:
“Si fillim, objektivi ynë është gjithmonë ndeshja e radhës. Pastaj synimi përfundimtar janë Kupat e Europës dhe për këtë do të punojmë çdo ditë.”
albaniaexpress.al
