FORMACIONI I ELBASANIT
Elbasani dhe Iliria nuk shkojnë më shumë se një barazim pa gola në “Elbasan Arena”, një javë para startit të kampionatit. Gvozdenoviç bëri shumë eksperiemente në formacion, për të marrë sinjalet që i duhen para duelit me Flmurtarin javën e ardhshme. Nga ana tjetër, Iliria u tregua një kockë e fortë dhe me investimet e bëra hedh kandidaturën si një nga ekipet pretendente për t’u ngjitur në elitë.
NDESHJA – Ishin verdheblutë ata që rrezikuan të parët me Ben Shimon, i cili u fut në zonë dhe goditi me të djathtën, por portieri Xhika u tregua i vëmendshëm duke e ndalur gjuajtjen. Reagimi i Ilirisë erdhi menjëherë: Selmani u shkëput bukur në zonë dhe goditi me kokë, por Janaçek devijoi me vështirësi duke shpëtuar portën e tij. Me kalimin e minutave, Elbasani mori kontrollin e lojës, duke qarkulluar topin dhe duke ushtruar presion të vazhdueshëm, edhe pse Iliria zbriste rrezikshëm në kundërsulm, duke krijuar panik në zonën elbasanase. Sakaq, vendasit u shfaqën rrezikshëm me Ze Gomesh dhe Kasën, të cilët provuan gjuajtje potente nga distanca, por edhe këtë herë portieri Xhika ishte në gatishmëri dhe nuk lejoi golin. Pavarësisht rasteve të pastra dhe ritmit të lartë të lojës, pjesa e parë u mbyll pa gola, duke lënë gjithçka të hapur për fraksionin e dytë.
Pjesa e dytë solli shumë ndryshime në përbërjet e të dyja ekipeve, por loja nuk humbi intensitetin. Ritmi mbeti i kënaqshëm dhe ndeshja u zhvillua me grintë, duke ofruar momente të bukura për tifozët, të cilët mbushën shkallët e tribunës qendrore.
Rastet për shënim nuk munguan nga asnjëra skuadër, të cilat e kërkuan golin me ngulm, por mbrojtjet dhe portierët ishin të vëmendshëm, duke mos lejuar që topi të përfundonte në rrjetë. Në fund, rezultati mbeti i pandryshuar, por loja dha sinjale pozitive për të dyja skuadrat në prag të sezonit të ri.
