Një eksperiencë autentike që ndërthur natyrën, traditën dhe mikpritjen shqiptare po merr jetë në Parkun Kombëtar Germenj–Shelegur me projektin “Një ditë me bariun”. Ky aktivitet fitues i platformës TIP Korça, i mbështetur nga Ministria e Turizmit dhe Mjedisit dhe në bashkëpunim me GIZ, prezanton një model të ri të turizmit rural të qëndrueshëm, duke u fokusuar në përvojat autentike dhe lidhjen e vizitorëve me komunitetin lokal.
Vizitorët ftohen të përjetojnë nga afër jetën e përditshme të barinjve të Kolonjës – nga shtegtimi i bagëtive dhe shëtitjet me kuaj, te gatimet tradicionale dhe netët magjike nën yje, pranë zjarrit. Përmes kësaj nisme, promovohet transhumanca, tradita shekullore e zonës, duke krijuar mundësi ekonomike për komunitetin lokal dhe duke ruajtur trashëgiminë kulturore.
Aktiviteti tashmë është pjesë e paketave turistike që nxisin zhvillimin e turizmit rural, duke ofruar një eksperiencë të veçantë për ata që kërkojnë të njihen me natyrën e paprekur dhe traditat autentike shqiptare.
