Tiranë : Drejtuesi i emisionit “5Pyetjet nga Babaramo”, gazetari Ilir Babaramo, është shkarkuar nga puna nga Report TV. Vendimi i shkarkimit i është komunikuar gazetarit nga pronari i televizionit, Carlo Bolino.
Në një deklaratë për mediat, Babaramo tha:
“Dje në orët e vona të mbrëmjes pronari i televizionit më ka telefonuar për të më komunikuar pushimin nga puna. Në këtë udhëkryq timin profesional dua të falënderoj të gjithë ata që besojnë se e vërteta nuk ka çmim. Bashkëpunimi im me Report TV është ndërprerë në mënyrë të njëanshme.”
Gazetari shprehu gjithashtu shqetësimin për presionin mbi gazetarët që kritikojnë institucionet:
“Nuk pranoj që të punosh për mua dhe të kritikosh qeverinë, përsëriste pa pushim,” tregon Babaramo.
Ilir Babaramo ka mbi 35 vjet përvojë në gazetari dhe është i njohur për hetimet dhe analizat e tij në fusha të ndryshme, përfshirë sistemin gjyqësor dhe çështje të transparencës.