Bashkia e Divjakës synon zhvillimin e turizmit të qëndrueshëm në territorin e saj. Për ta bërë këtë konkret, ajo ka nisur një bashkëpunim të ngushtë me bashkinë e Ankonës në Itali. Dy kryetarët e bashkive nënshkruan një memorandum bashkëpunimi.
Projektet e përbashkëta i prezantoi kryebashkiaku Josif Gorrea dhe lidhen me detin dhe lagunën, trajtimin e ujërave të ndotura, kompostimin e mbetjeve organike si dhe ruajtjen e sitet arkeologjike.
Në Ankona jetojnë 1500 qytetarë të Divjakës, që përfaqësojnë një urë lidhëse midis dy qyteteve.
“Mendoj se qytetarët e Ankonës mund të gjejnë këtu jo vetëm turizmin detar por edhe kulturor. Potencialin dhe problemet e zonës i dëgjuam dhe do të ndihmojmë në zgjidhjen e disa prej tyre, si biodiversiteti dhe laguna. Kjo nuk është e thjeshtë, ndaj do të angazhohemi në krijimin e një projekti të nivelit të lartë. Ky është takimi ynë i parë dhe do të bëjmë të mundur që turizmi shqiptar, i cili për momentin është në modë për ne italianët, të zgjatet në kohë”, shprehet Giovanni Zinni, nënkryetar i bashkisë Ancona.
Më herët u kryen vizita të përbashkëta në zonat turistike të Divjakës, në Lagunën dhe Kishën e Karavastasë, në bregdetin e Adriatikut etj. Italianët e konsideruan Divjakën si një potencial të madh zhvillimi dhe premtuan se disa nga projektet do t’i paraqesin në BE për të tërhequr ndihma ekonomike për investime të mëdha.
