Deputetja e Partisë Socialiste të Shqipërisë, Romina Kuko, ka reaguar për situatën e krijuar pas bllokimit të rrugës Librazhd–Përrenjas, duke e cilësuar atë si një problem serioz që ka prekur drejtpërdrejt jetën e qytetarëve.
Në reagimin e saj publik, Kuko thekson se bllokimi i kësaj arterie të rëndësishme të juglindjes ka cenuar lëvizjen e lirë, sigurinë dhe përditshmërinë e banorëve, ndërsa shton se kjo situatë është e papranueshme dhe nuk duhet të zgjasë.
Deputetja shpreh mbështetjen për hetimet e nisura nga Prokuroria e Shqipërisë, duke kërkuar që ato të zhvillohen me shpejtësi, paanësi dhe transparencë të plotë.
Sipas saj, zbardhja e plotë e shkaqeve dhe përcaktimi i përgjegjësive është një detyrim ndaj qytetarëve dhe ligji duhet të veprojë njësoj për të gjithë.
Kuko nënvizon gjithashtu se qytetarët kanë të drejtë të kërkojnë zgjidhje dhe të dëgjohen, ndërsa institucionet kanë përgjegjësinë të ndërhyjnë për të rikthyer normalitetin sa më parë.
Deputetja shton se autoritetet janë duke punuar për të zgjidhur situatën, ndërsa thekson se qytetarët meritojnë qetësi, siguri dhe respekt.