Deputetja e Partisë Socialiste për Qarkun e Elbasanit, Bora Muzhaqi, së bashku me kryetarin e Bashkisë Librazhd, zhvilluan një takim me banorët e Polisit për të diskutuar projektbuxhetin e Bashkisë Librazhd për vitin 2026.
Gjatë bashkëbisedimit, Muzhaqi theksoi rëndësinë e përfshirjes së qytetarëve në procesin vendimmarrës dhe garantoi se kërkesat dhe nevojat e komunitetit do të jenë prioritet në hartimin e buxhetit të ardhshëm.
“Dëgjimi i qytetarëve është hapi i parë për çdo vendim të drejtë, ndaj çdo kërkesë e çdo nevojë e zonës është prioritet për ne”, shkruan ajo në një postim në rrjetet sociale pas takimit.
Muzhaqi, e cila ka rrënjë familjare në këtë zonë, deklaroi se do të mbetet një zë i fortë në Kuvend për interesat e Polisit dhe të gjithë Librazhdit.
Ajo nënvizoi se investimet e deritanishme janë vetëm fillimi dhe se me buxhetin e ri priten projekte të reja që do të rrisin cilësinë e jetës në këtë njësi administrative.
“Punët e mira që janë bërë janë vetëm fillimi. Me buxhetin e ri do të bëjmë edhe më shumë”, theksoi deputetja socialiste.
Takimi vjen në kuadër të konsultimeve publike që Bashkia Librazhd po zhvillon me komunitetin, për të ndërtuar një projektbuxhet sa më gjithëpërfshirës dhe të orientuar drejt zhvillimit të qëndrueshëm të zonës.
