Në Ditën Evropiane të Drejtësisë Civile, deputetja e Partisë Socialiste për Qarkun Elbasan, Aulona Bylykbashi, ka përcjellë një mesazh të qartë për rolin që drejtësia duhet të ketë në jetën e çdo qytetari dhe në rrugëtimin europian të vendit.
Në një postim në rrjetin e saj social Facebook, deputetja Bylykbashi shprehet:
“Sot shënojmë Ditën Evropiane të Drejtësisë Civile, një ditë që na kujton se drejtësia duhet të jetë e kuptueshme, e afërt dhe e prekshme për çdo qytetar. Misioni ynë qeverisës është ta sjellim drejtësinë më pranë njerëzve, me institucione më transparente, më të besueshme dhe më europiane.”
Kjo ditë, e cila u iniciua nga Këshilli i Europës dhe Komisioni Europian që prej vitit 2003, synon të afrojë qytetarët me sistemin e drejtësisë dhe të rrisë ndërgjegjësimin mbi të drejtat e tyre.
Deputetja Bylykbashi nënvizon se Shqipëria po ecën me vendosmëri në rrugën e forcimit të institucioneve të drejtësisë, duke përmbushur standardet europiane në shërbim të qytetarëve dhe të shtetit të së drejtës.
“Shqipëria vijon rrugëtimin e saj drejt forcimit të institucioneve dhe përmbushjes së standardeve europiane në shërbim të drejtësisë dhe qytetarëve,” – thekson ajo.
Në këtë kuptim, Dita Evropiane e Drejtësisë Civile shërben si kujtesë për rëndësinë që ka transparenca, besimi dhe aksesueshmëria e sistemit të drejtësisë në çdo shoqëri demokratike.
Nën frymën e reformave të ndërmarra dhe në përputhje me vizionin europian të vendit, mesazhi i deputetes Aulona Bylykbashi është një thirrje për drejtësi më njerëzore, më të ndershme dhe më pranë qytetarit, një drejtësi që i shërben njerëzve dhe jo burokracisë.
