Në prag të përballjes vendimtare ndaj Atletic Escaldes, trajneri i Dinamos, Ilir Daja, ka mbajtur një konferencë për shtyp ku theksoi se pavarësisht fitores 2-1 në transfertë, dinamovitët duhet të hyjnë në fushë me të njëjtin intensitet sikur gjithçka është në baraspeshë. Sfida luhet në “Elbasan Arena” dhe synimi i vetëm është kalimi në turin tjetër. “Nuk ka ndeshje të lehta në Europë. Kemi bërë një hap pozitiv në takimin e parë, por nuk mjafton. Duhet përqendrim maksimal dhe respekt për kundërshtarin”, tha tekniku me eksperiencë, që ka në CV-në e tij 55 ndeshje europiane.
Gjendja e skuadrës dhe dilemat
Për Dinamon ka edhe lajme pozitive, pasi rikthehen dy titullarë të rëndësishëm si Bruno Dita dhe Itodo, të cilët munguan në sfidën e parë. “Kemi disa rikthime të rëndësishme, por edhe një mungesë të madhe si Rustemi, që u dëmtua në stërvitje. Do donim ta kishim gjithë grupin në dispozicion, por jemi gati”, tha Daja, duke shtuar se edhe një tjetër futbollist është në dyshim për arsye shëndetësore. Sa i përket formacionit, ai nuk dha detaje, por theksoi se strategjia është e qartë dhe çdo vendosje do të ketë qëllim ruajtjen e ekuilibrave në fushë.
Objektivi: vetëm kualifikimi
Tekniku i Dinamos refuzoi të flasë për kundërshtarin e mundshëm në turin tjetër apo për skenarë si penalltitë. Ai ishte i prerë: “Energjia jonë është vetëm për këtë ndeshje. Nuk mendojmë më larg. Këto janë ndeshje që duan përgjegjësi dhe pjekuri. Nuk ka lojtarë të rinj apo të vjetër, por vetëm ata që janë në formë optimale”. Daja komentoi edhe largimin e Zabërgjes dhe Mandelës, duke e konsideruar pjesë të logjikshme të merkatos, por theksoi se Dinamo mbetet e fortë dhe e mbështetur financiarisht nga një president korrekt. Mesazhi i tij i fundit ishte i qartë: “Duhet të përfaqësojmë jo vetëm Dinamon, por gjithë futbollin shqiptar në arenën europiane.”
albaniaexpress.al
