Trajneri i Burnley-t, Scott Parker, ka dhënë një përditësim të rëndësishëm mbi gjendjen fizike të sulmuesit shqiptar Armando Broja, i cili ende nuk ka debutuar me skuadrën e tij të re në Premier League. Broja mungoi në listën e lojtarëve të grumbulluar për ndeshjen hapëse të sezonit ndaj Tottenham-it, por duket se momenti i tij po afron me shpejtësi.
Sipas Parker, rikuperimi i 22-vjeçarit po ecën sipas planit dhe çdo javë sjell përmirësime të dukshme. “Armando është tashmë një javë më tej në procesin e rikuperimit, ka bërë më shumë punë dhe kjo më gëzon shumë,” tha trajneri anglez, duke theksuar se sulmuesi shqiptar po i afrohet formës së duhur për të qenë i gatshëm të zbresë në fushë.
Burnley do të përballet në fundjavë me Sunderland-in dhe ka gjasa që kjo të jetë sfida e parë ku Broja mund të marrë minuta me fanellën e re. Klubi dhe stafi teknik janë të kujdesshëm për ta rikthyer atë gradualisht, duke shmangur çdo rrezik dëmtimi të ri, ndërsa pritshmëritë për kontributin e tij mbeten të larta, pasi pritet të shtojë forcë dhe alternativë në repartin ofensiv.