Zonat verilindore të vendit janë përfshirë nga një valë e ftohtë, e cila ka sjellë ulje të ndjeshme të temperaturave, shoqëruar me reshje shiu dhe dëbore.
Në lartësitë mbi 1000 metra, reshjet kanë qenë kryesisht në formë bore, duke mbuluar me një shtresë të bardhë fshatra të thellë si Shishtaveci, Zapoti, Topojani, Gryk-Qaji, Arreni dhe Kalisi. Pamjet që ofron natyra janë tipike dimërore, edhe pse jemi ende në fillim të tetorit.
Deri më tani nuk raportohen probleme në qarkullimin rrugor apo në furnizimet e zonave të izoluara.
Autoritetet lokale u bëjnë thirrje drejtuesve të mjeteve të tregojnë kujdes të shtuar gjatë lëvizjes, për shkak të lagështisë së rrugëve dhe rrezikut për formim akulli në disa akse.